Parlament/ Noka: Në batërdinë e shëndetësisë ka një përgjegjës, ai është Edi Rama dhe çeta e hajdutëve!

Sekretari i Përgjithshëm i PD-së, Flamur Noka duke folur në sallën e parlamentit për skandalin tek Onkologjiku, është shprehur se për këtë situatë ka vetëm një përgjegjës, që është Edi Rama dhe çeta e tij e hajdutëve.

Fjala në Kuvend

Jemi më të mirët, kemi dhe përvojë tha dje sulltani i këtyre që janë majtas.

Po, po, më të mirët në vjedhje, dhe keni goxha përvojë sa keni shkuar tek vjedhja 100 për qind.

Edhe ajo që ndodhi tek onkologjiku nuk ishte as rastësi, as spontane. Kështu funksioni ju.

Ndaj është krejt e natyrshme, dhe e kuptueshme revolta dhe zemërimi si dhe neveria që kanë shkaktuar në publik episodet e onkologjikut.

Unë jam mjek që kam punuar tek onkologjiku dhe i kam koleg të gjithë ata. Ndjej keqardhje dhe dhimbje, por kushdo që ndot bluzën e bardhë drejtësia të veprojë mbi të.

Ama të kemi parasysh një gjë. Në këtë atmosferë ne duhet të jemi të kthjellët dhe të bëjmë një analizë.

Edhe dje kur tek onkologjiku kishte rënë bomba, qytetarëve u është shërbyer nga mjekët dhe stafi mjekësor. Edhe dje qindra pacientë janë vizituar, kanë kryer seancat që duhet. Mjekët më të keqpaguarit e Europës kanë punuar dhe punojnë me shërbim për tu shërbyer dhe për tu ardhur në ndihmë pacientëve. Këtë nuk duhet ta harrojmë asnjëherë.

Ndaj duhet të jemi të kujdesshëm, kurrë nuk duhet të ngrejmë histeri kolektive kundër mjekëve.

Por kjo gjë e gjitha ka një burim; propagandën e qeverisë për të shpëtuar nga burimi i të keqes edhe tek onkologjiku, tek sistemi shëndetësor dhe çdo sistem tjetër në Shqipëri. E gjitha kjo bëhet me regji, që nesër Rama të ju thotë shqiptarëve të lodhur, të sfilitur, të vjedhur dhe të rraskapitur me shëndetësinë falas të tij, të thotë ja, fajtorët nuk jemi ne, por janë mjekët. Ata i hanë kumbullat pas shpine kryeministrit.

E gjitha kjo ka një qëllim, të spostohet vëmendja nga batërdia e vërtetë e qeverisë dhe të vihen nën akuzë të gjithë mjekët. Ka mjek që e ndyjnë bluzën e bardhë dhe e shkelin betimin e Hipokratit.

Por tenderomania e shëndetësisë, e ka shkatërruar shëndetësinë sepse është vjedhur çdo para publike dhe spitalet shqiptare sot janë ditën më të zezë, të vetmit që janë brenda atyre karakatinave janë mjekët dhe personeli shëndetësor.

Në çdo spital ka mangësi me medikamente, ka probleme të rënduara me aspektin e imazherisë.

E mbani mend Ramën ku prezantoi akseleratorin dhe skandali i para pak ditëve nxori në dritë se ai akselerator kishte 4 vjet që rrinte aty dhe nuk vihej në punë. Kjo sepse dikush nga këta të pushtetit, bën biznes privat, dhe ka aparat kobalti privat.

Duhet të kemi një gjë parasysh. Po spitalet që po mbyllen në gjithë Shqipërinë, a e kanë fajin mjekët.

Isha në Has para ca ditësh, a e dini se çfarë ndodhte?

Po mbyllej spitali i Hasit. Po mbyllen spitalet në shumicën e qyteteve të Shqipërisë. Shumica e spitaleve nëpër Shqipëri janë han ku flenë pacientët. Peshku qelbet nga koka, Ali Baba dhe 40 hajdutët janë përgjegjës për gjithçka dhe këtë duhet ta dinë shqiptarët.

Në të gjithë këtë batërdi të shëndetësisë, ka një përgjegjës dhe është Edi Rama dhe çeta e hajdutëve.

Sa herë që një njeri ka një hall, që një familjar nuk do të gjejë medikamentet jetike, nuk do të ketë mundësi të bëjë një skaner apo rezonancë, duhet që ju qytetarë të keni parasysh këto fytyra që rreshtohen këtu.

Këta ua pamundësojnë, këta ua vjedhin paratë dhe taksat tuaja, dhe jo mjekët.

Jam i bindur se vetëm këta janë të kënaqur nga shpërthimi i këtij skandali, sepse në publik këta janë të lumtur se dolën armiqtë dhe u fshehën armiqtë e vërtetë të sistemit shëndetësor në Shqipëri.

Kjo është politika perverse që sulltan Surreli dhe çeta e hajdutëve këtu mbrapa kanë ndjekur që prej ditësh së parë që kanë marrë pushtetin.

E mbani mend sulltan Surrelin, të tjerët e kishin fajin. Edhe kur ishte kryetar bashkie e përmbyti Tiranën, e ka bë ministër atë që përmbyti Tiranën. Por fajin jo, fajin e kishin të tjerët.

Edhe tani për kanabizimin, kriminalizimin, drogën, korrupsionin nuk kanë fajin këta. Propaganda e regjimit fjalin e nxjerr tek qytetari, mjeku, mësuesi, bujku, i papuni, pensionisti, por kurrë propaganda nuk e pranon që faji është këtu.

Paratë tuaja shqiptarë i vjedhin këta këtu, ja ku i keni. Ndaj ky gjithmonë opozita e ngre zërin, sepse të vërtetën nuk e thotë propaganda qeveritare, por opozita. Ndaj ky shfryn mllef ndaj opozitës se është mësuar të fajësojë të tjerët.

Vjedh vetë, vjedh çeta e hajdutëve të Ali Babës, por fajin e kanë ata që ngrejnë gishtin.

Ndaj dhe drejtësinë kështu e ka orientuar tani, sepse ky është mësuar të mos mbajë asnjëherë përgjegjësi për vjedhjet që ka kryer ai dhe banda e tij.

Po të mos vidhte me Vilma Nushin, paratë e koncesionit të check up, onkologjiku do të kishte pajisjet më moderne të mundshme.

Edi Rama e çeta e hajdutëve e dinë shumë mirë gjendjen në shëndetësi, kanë pasur informacion se ata janë shkaktarët e saj, por nuk kanë reaguar. E dini pse nuk e kanë bërë? Sepse kështu vjedhin më shumë dhe e drejtojnë gishtin ndaj mjekëve.

Prandaj në 11 vite prioriteti i Ramës nuk ka qenë shëndeti i shqiptarëve, jo, kanë qenë koncesionet për të vjedhur, fasadat, dhe mbi të gjitha propaganda.

Koha po ja nxjerr bojën edhe fasadës edhe propagandës.