Kompania Terraoil Swiss (ISH-Transoil) parashikon që të shtojë në lejen e saj edhe 14 puse të tjerë me vendndodhje në Visokë ku edhe ka aktivitetin e saj sipas marrëveshjes me ndarje në burim me qeverinë shqiptare nga viti 2008.
Në një dokument të paraqitur pranë autoriteteve ku kërkohet leje për menaxhimin e mbetjeve, kompania jep detaje edhe mbi planet e saj që parashikojë aktivizimin e më shumë puseve në lejen aktuale.
“Terraoil Swiss sha do të shtojë në lejen e mjedisit që disponon 14 puse të tjerë që nuk janë të cituara në këtë lejë. Theksojmë se të gjithë këto puse që do të shtohen në lejen e Mjedisit janë brenda zonës naftëmbajtëse të Visokës, sipas marrëveshjes hidrokarbure që Terraoil Swiss disponon. Gjithashtu përveç puseve Terraoil Swiss kërkon të shtojë dhe piken me ID: 5.3 a) Asgjësim i mbetjeve të rrezikshme përveç incinerimit (5.1.a) ose landfilllimit (5.2.a)” thuhet në dokument.
Në të njëjtin dokument pohohet se nga puset e vendburimit Visokë nxirret rreth 2000 ton/muaj fluidm, me përmbajtje mesatare 20 % naftë dhe 80% ujë.
“I gjithë prodhimi i fluidit nga puset, magazinohet fillimisht në depozitat e puseve, ose në ato të grupeve të prodhimit, dhe prej andej transportohet me tubacione ose automjete drejt stacionit të dekantimit. Në këtë stacion janë instaluar kapacitete depozituese për pritjen e të gjithë sasisë së fluidit të prodhuar dhe për trajtimin e shkallëzuar të tij. Fillimisht për ndarjen e sasisë së ujit të lirë që ndodhet në fluid për shkak të densiteteve të ndryshme, e më pas kalimi ne depo me ngrohje ku kryhet ndarja përfundimtare e ujit deri në sasinë që pranohet nga standardet e uzinave të përpunimit (deri 3 % ujë)” thuhet në dokument.
Vendburimi i Visokës ndodhet në Fier saktësisht në Mallakastër dhe kompania ka në përdorim një sipërfaqe 28.6 kilometra/katror. Sipas lejes janë aktivë 35 puse, gjysmë-aktivë 36 puse, inaktivë 73 puse, rezervë 45 puse dhe të thatë 54 pse.
Terraoil Swiss ka aktive një marrëveshje koncesioni me qeverinë shqiptare që nga viti 2008 për vendburimin e Viskoës. Referuar regjistrit të pronarëve përfitues 31.4 për qind të kuotave janë nën emrin e administratorit Shefqet Dizdari, 31.4 nën emrin e z.Peter Krempin me shtetësi gjermane dhe pjesa tjetër nuk janë deklaruar.
Monitor. Al
Nafta në Visokë, Terraoil Swiss sh.a do të shtojë edhe 14 puse të tjerë
