Kryetari i Lëvizjes për Ripërtëritje Serbe dhe ish-shefi i diplomacisë Vuk Drashkoviç tha sot se propozimi i rezolutës së Lëvizjes Socialiste të Aleksandar Vulinit për anëtarësimin e Serbisë në BRICS është marrëzi që as nuk duhet të merret parasysh.
Drashkoviç tha për agjencinë Beta se e vetmja rrugë e arsyeshme për Serbinë është ajo evropiane.
“Ajo rezolutë është e pakuptimtë që as nuk duhet të merret parasysh. Që nga themelimi e deri sot, SPO është për Serbinë në Evropë dhe Evropën në Serbi. Kjo është mënyra e vetme e arsyeshme”, tha ai.
Ai theksoi se paraqitësi i rezolutës është një përfaqësues “fanatik” i politikës së Sllobodan Millosheviçit dhe Mirjana Markoviçit në vitet nëntëdhjetë “të tmerrshme” të shekullit të kaluar, “dhe sot ai është njeriu më besnik në Serbi ndaj regjimit në Kremlin”.
“Duke paraqitur këtë rezolutë të çmendur, ai përdor të vërtetën tragjike se sot për shumicën dërrmuese të serbëve në Serbi, Republika Srpska dhe Mali i Zi, vendet e aleancës së NATO-s dhe Bashkimit Evropian, i gjithë ‘Perëndimi kolektiv’ janë armiqtë e popullit serb, ndërsa janë miq dhe mbrojtës të serbëve Rusia, Kina, Koreja e Veriut, Irani, Siria, Venezuela, diktaturat afrikane nën komandën e Wagnerit”, tha Drashkoviç.
Ai shtoi se propozimi i Lëvizjes Socialiste është pasojë e “hipnotizimit” afatgjatë të serbëve nga fushata dhe veprimet e udbashe, të Kishës Ortodokse Serbe, shumë akademikëve dhe anëtarëve, siç tha ai, të ashtuquajturës elitë kombëtare dhe pothuajse të gjitha mediat.
“Zyrtarisht Serbia është ‘në rrugën e anëtarësimit në BE’. Në këtë rrugë BE-ja dhe Perëndimi përdoren si bankomat për investime dhe donacione dhe po bëhet një luftë propagandistike kundër BE-së dhe Perëndimit, edhe më ashpër dhe më primitive se junta agresore në Kremlin”, përfundoi Drashkoviç.
Më 28 gusht, deputetët e Lëvizjes Socialiste, partia e themeluar nga Aleksandar Vulin, paraqitën një propozim për një rezolutë për anëtarësimin e Serbisë në BRICS.
“Të vetëdijshëm për faktin se bota në të cilën jetojmë po ndryshon në mënyrë të pakthyeshme, ne shprehim nevojën për hapjen e një dialogu të gjerë social para publikut të Republikës së Serbisë për faktin e padiskutueshëm se rruga evropiane e Serbisë ka një alternativë të qartë të mishëruar në procesin e anëtarësimi në organizatën BRICS, si procesi më aktual integrues ekonomiko-politik global”, thuhet në propozimin e dorëzuar në Kuvendin e Serbisë.
Deputetët e Lëvizjes Socialiste vlerësuan se bota është bërë sërish multipolare pas tre dekadash, “me fundin gjithnjë e më të dukshëm të hegjemonisë politike të Perëndimit kolektiv”.
“Mungesa e dialogut të hapur social, imponimi i integrimit në BE si zgjidhje e gatshme dhe e vetmja rrugë, së bashku me hipokrizinë e administratës së Brukselit, shantazhet e vazhdueshme politike dhe kërkesën për heqjen dorë nga një pjesë e territorit shtetëror, çuan për faktin se qytetarët e Serbisë më në fund e kuptuan masivisht se ishin viktima të një manipulimi të mirëmenduar të kolektivit të perëndimit. Rezultati i gjithë kësaj është fakti se afër dy të tretat e qytetarëve e kanë perceptuar anëtarësimin e Serbisë në BRICS si një opsion integrues më të mirë dhe më të pranueshëm, i cili në afat të gjatë ofron perspektiva më të mira për zhvillim më të shpejtë dhe më të mirë ekonomik”, tha Lëvizja Socialiste, themeluesi i së cilës ishte Aleksandar Vulin.
BRICS është një grupim i ekonomive botërore të Brazilit, Rusisë, Indisë, Kinës dhe Afrikës së Jugut, i formuar nga shtimi i Afrikës së Jugut në vitin 2010 në paraardhësin BRIC. Akronimi origjinal “BRIC”, ose “BRICs”, u krijua në 2001 nga ekonomisti i Goldman Sachs, Jim O’Neill për të përshkruar ekonomitë me rritje të shpejtë që ai parashikoi se do të dominonin kolektivisht ekonominë globale deri në vitin 2050
VOAL
