Duket se radhën e largimit nga puna në bashkinë Shkodër e ka patur kryeinspektori i IMT-së, Gentian Ibro.
Simbas këshilltares së kësaj bashkie Eliona Kodra Shkreli, gjithçka është e pabazuar në ligj dhe “fshesa politike” do të shndërrohet në furtunë me fillimin e vjeshtës.
Reagimi i plotë i këshilltares bashkiake:
Bashkia Shkodër vijon operacionin politik “Fshesa” të drejtorëve të administratës së shkuar. Nën kujdesin e veçantë të stafit tiranas, titullari I kësaj bashkie z.Benet Beci vazhdon ‘hakmarrjen’ politike duke larguar nga puna, pa I ofruar një pozicion tjetër, të gjithë drejtuesve të kryetarëve paraardhës të Tij, ish kolegëve të partisë së cilës z.Beci I shërbeu për vite me radhë.
Rradha vijoi këtë herë me kryeinspektorin e IMT-së pranë Bashkisë Shkodër, Gentian Ibro! Pas disa kontrolleve të ushtruara nga Kontrolli i Lartë Shtetit dhe auditi i brëndshëm përgjatë viteve, z.Ibro ka rezultuar pa shkelje në të gjitha dokumentacionet. Kontrolle të përvitshme ka patur edhe nga vetë IKMT ku ka rezultuar gjithmonë pa shkelje në detyrën e kryer.
Domosdoshmëria e zbatimit të planit të aksionit “Fshesa” bën që Bashkia e Re të kërkojë ndihmën e IKMT Tiranë për të ndihmuar në gjetjen e alibisë së shkarkimit të kryeinspektorit Ibro, konspiracione të cilat jemi mësuar t’i shohim në filmat të zhanrit aksion-triller të Netflix.
Gjetja e ‘gjilpërës në kashtë’ është një vendim I IKMT-së së Përgjithshme (Inspektoriati Kombëtar i Mbrojtjes së Territorit) që mban firmën e Kryeinspektorit të IKMT-së Agim Ismaili, në të cilin citohet: “ Shtrembërim I rezultateve të kontrollit në fushen e ndërtimit, planifikimit dhe zhvillimit të territorit”.
Duket se nguti për të plotësuar dëshirën e shokut të partisë ka bërë që IKMT e Përgjithëshme t’i bjerë ndesh IKMT dega Shkodër ku për të njëjtin objekt ka konstatuar se z.Ibro ka ndjekur rregullisht procedurën ligjore në lidhje me objektin në fjalë (procesverbali I IKMT Shkodër më poshtë). IKMT Tiranë gjobit me vlerën 400.000 lekë kryeinspektorin e IMT-së Shkodër, Gentian Ibro, por harron se edhe IKMT Shkodër ka bërë të njëjtën shkelje, por ç’rëndësi ka…me rëndësi është alibia për largimin nga puna të Kryeinspektorit Bashkiak.
Një ditë pas letrës së publikuar edhe në portale, zotit Ibro I është komunikuar me shkresë nga zyra e protokollit të Bashkisë, shkarkimin nga puna, pa lejuar kryeinspektorin të ndjekë në rrugë gjyqësore kundërshtitë në vendime të IKMT-ve ne Tiranë e Shkodër të cilat kanë mbajtur qëndrime të ndryshme për të njëjtin objekt!
Operacioni politik “Fshesa” duket se do vazhdojë me ritme më të shpejta me ardhjen e shtatorit, ndërsa letra e fushatës së kryebashkiakut ka filluar të fshijë gërmat e shkruara me aq kujdes e dashuri si pjesë e propagandës elektorale!
