Mbas ekzekutimit të 62-vjeçarit që plagosi bashkëshortet dhe djalin e tij, nga RENEA dhe efektivët e Korçës, ka reaguar Ministri i Brendshëm, Taulant Balla.
Me një status në rrjetet sociale, Balla ka shprehur mirënjohje për operacionin e Policisë duke theksuar se:” çrrënjosja e dhunës ndaj grave dhe dhunës në familje është një detyrë kryesore e institucioneve…”
Postimi i plotë i tij:
???????? Mirënjohje forcave RENEA dhe atyre të Drejtorisë Vendore të Policisë Korçë për kryerjen e detyrës me përgjegjësi të lartë gjatë gjithë natës së mbrëmshme deri sot në mëngjes në Maliq edhe në kushtet e kërcënimit për jetën, sepse thirrjeve të Policisë së Shtetit, shtetasi që kërkohej të ndalohej, ju kundërvu me përdorimin e armës ndaj policisë. Në këto rrethana përcaktimet ligjore janë të qarta dhe Policia e Shtetit zbatoi Ligjin.
Dua ta siguroj publikun se çrrënjosja e dhunës ndaj grave dhe dhunës në familje është një detyrë kryesore për ne në bashkëpunim me institucionet e tjera ligjzbatuese dhe me komunitetin në çdo cep të territorit. Çdo grua, çdo vajzë duhet të ketë besimin se telefonata e saj tek Policia është vendimi i duhur që sjell çlirimin nga makthi dhe fitoren e ligjit mbi padrejtësinë dhe dhunën.
