Gjashtë persona janë arrestuar nga policia në Ekuador pasi akuzohen për vrasjen e kandidatit për president Fernando Villavicencio.
Të ndaluarit nga policia ekuadoriane janë të gjithë shtetas kolumbianë dhe dyshimet janë se sulmi vdekjeprurës ndaj njeriut që i shpalli luftë bandave është porositur pikërisht nga shtetit fqinj në Amerikën Latine.
I dyshuari kryesor që shkrehu dhe pistoletën dhe u ekzekutua në vend nga forcat e sigurisë raportohet po ashtu të jetë kolumbian.
Villavicencio u qëllua disa herë me armë teksa po largohej nga një takim elektoral në Quito.
Pas vrasjes së tij, në vend është shpallur gjendja e jashtëzakonshme për 60 ditë dhe situata paraqitet e tensionuar.
Ministri i Brendshëm, Juan Zapata deklaroi se hetimet po vijojnë me intensitet deri në gjetjen e porositësve të këtij krimi të urryer, ndërsa më herët gjatë ditës karteli i drogës “Los Lobos” (Ujqërit), mori përgjegjësinë e sulmit ndaj kandidatit për president.
Presidenti Guillermo Lasso tha se vrasja ishte një përpjekje për të sabotuar zgjedhjet. Ai deklaroi se votimet do të zhvillohen siç ishte planifikuar më 20 gusht, pavarësisht nga gjendja e jashtëzakonshme.
