Kërkesa nga blerësit për herë të parë, ngadalëson ritmin e zbritjes.
Çmimet e shtëpive, kanë rënë për të katërtin muaj radhazi, rreth 9,000 £ më pak se vlera e verës së vitit të kaluar.
Kostoja mesatare e një prone, ra me 2.4 për qind në vitin deri në korrik, sipas indeksit të çmimeve të banesave Halifax, duke rënë me 2.6 për qind në qershor, nga 1.1 për qind në maj.
Kjo do të thotë se një shtëpi, tani vlen 285,044 £, nga 293,992 £ gushtin e kaluar. Çmimet ranë 0.3 për qind në korrik, rënia e katërt radhazi.
Ndryshimi vjetor i çmimeve të banesave
Ai vjen pasi një indeks i veçantë, tha se çmimet e banesave ranë me ritmin më të shpejtë, që nga viti 2009, në muajin korrik.
Sidoqoftë, kërkesa nga blerësit për herë të parë, po frenon rëniet e mëtejshme, thanë ekspertët.
Transaksionet e blerjes dhe miratimet e hipotekave në qershor, ishin në rritje, megjithëse në rënie në krahasim me të njëjtën kohë të vitit të kaluar, duke përforcuar shpresat se tregu po reziston shumë më mirë se sa pritej.
Në veçanti, aktiviteti mes blerësve për herë të parë, po mbahet relativisht mirë, duke treguar se disa tani po kërkojnë shtëpi më të vogla, për të kompensuar kostot më të larta të huamarrjes.
Në anën tjetër, sektori i blerjeve të banesave me qëllim dhënien e tyre me qira, duket se është nën presion, megjithëse normat e larta të interesit janë vetëm një nga faktorët, që ndikon në modelet e biznesit të pronarëve, së bashku me konsideratat e reformave të ardhshme të tregut të qirave.
Mbetet për t’u parë, se sa mund të zgjedhin të largohen dhe çfarë do të thotë kjo për furnizimin e pronave të disponueshme për t’u blerë.
Sipas Moneyfacts, norma mesatare për një hipotekë dyvjeçare është tani 6,85 për qind për pronarët e shtëpive dhe 6,82 për qind për pronarët e banesave që jepen me qira.
Çmimet e shtëpive po bien më shpejt në juglindje. Çmimet ranë 3.9 për qind gjatë 12 muajve të fundit, ku një shtëpi mesatare humbi 15,500 £ të vlerës së saj dhe prona në rajon tani kushton 382,489 £.
Çmimet në Londër janë ulur 3,5 për qind gjatë të njëjtës periudhë kohore, ndërsa në Uells, vendi i disa prej rritjve më të shpejta të çmimeve të banesave, të dëshmuara gjatë pandemisë, vlerat mesatare janë ulur 3,3 për qind, në 214,495 £.
Në Skoci, çmimet u ulën me më pak, duke rënë me vetëm 0.7 për qind gjatë vitit të kaluar, ndërsa në Irlandën e Veriut u ulën me vetëm 0.3 për qind.
Një analizë e veçantë nga Laburistët skocezë, tha se më shumë se 60,000 shtëpi në Skoci, mund të jenë në rrezik të ndryshimit të pronarëve, për shkak të rritjes së kostove të hipotekave.
Një zëdhënës i Thesarit tha: “Ne e dimë se rritja e çmimeve është shqetësuese për familjet në të gjithë vendin, prandaj përgjysmimi i inflacionit këtë vit dhe kthimi në objektivin 2 për qind, është prioriteti ynë.
Ne po i mbështesim njerëzit në këto kohë të vështira, me një nga paketat më të mëdha të kostos së jetesës në Europë, me vlerë 3,300 £ mesatarisht për familje, gjatë këtij viti dhe të fundit, ndërsa heqim miliona nga pagimi i tatimit mbi të ardhurat, duke rritur pagën minimale në vlerën më të madhe dhe duke ndihmuar ata, që hasin vështirësi me kostot e hipotekës.” / Telegraph
