Italia është e mrekullueshme, me plazhet e saj me rërë të bardhë, me ujërat blu të kristalë, që humbasin në horizont, me artin, arkitekturën, kulturën e traditat që trashëgohen brez pas brezi dhe ruhen me xhelozi në të gjithë “çizmen”.
Sot do të udhëtojmë në një vend, thesar, ende pak të njohur, i fshehur në malet e Valle Sabbia. Quhet Belprato dhe është fshati me shtëpi të pikturuara.
Belprato, një thesar për t’u zbuluar
Udhëtimi ynë sot na çon nëpër natyrën e Valle Sabbia, një luginë para-alpine në pjesën lindore të provincës së Brescias.
Pikërisht këtu, mes peizazheve malore dhe natyrës së harlisur, mund të zbuloni një mikrokozmos mrekullish që ende nuk është mposhtur nga turizmi masiv.
Po flasim për Belprato, një thesar i vërtetë mes livadheve të gjelbra dhe pyjeve që karakterizojnë komunën e Pertica Alta në Brescia.
Një fshat i vogël, të cilit, si shumë të tjerë, i është dashur të luftojë kundër një fati që duket se tashmë është vulosur: shpopullimin.
Pak më shumë se 100 banorë kanë zgjedhur të qëndrojnë dhe të jetojnë këtu dhe janë bërë dëshmi e një rilindjeje që ka ndryshuar Belprato në një fshat të pikturuar. Në fshat ka pak shtëpi, por ato mjaftojnë për t’i transportuar njerëzit në një përrallë shumëngjyrëshe.
Më shumë se 70 vepra zbukurojnë shtëpitë dhe rrugët e fshatit, që e kanë bërë Belprato nga viti 2013 e deri më sot, një galeri arti.
Artistë të shumtë italianë dhe ndërkombëtarë, vit pas viti, kanë ardhur në Belprato për të lënë gjurmën e tyre, duke krijuar kryevepra dhe murale që sot karakterizojnë në mënyrë unike këtë fshat-muze tërheqës.
Fshati me shtëpi të pikturuara
Origjina e projektit që transformoi pjesën e vogël të Pertica Alta në një fshat të pikturuar daton në vitin 2013 dhe lidhet me një ide të artistit vendas Marino Gabusi cili vendosi të ndryshojë fshatin e vogël malor nëpërmjet artit.
Falë bashkëpunimit me Shoqatën Anima della Pertica u pikturuan shtëpitë e para. Që nga ai moment çdo vit këtu vijnë piktorë, dekoratorë, stilistë italianë dhe të huaj për të zbukuruar fasadat e ndërtesave.
Ata e bëjnë këtë me teknika të ndryshme piktorike, ilustrime dhe vizatime për t’i dhënë vlerë këtij vendi, duke emocionuar cilindo që ecën në rrugicat e këtij vendi.
/ Si Viaggia.it
