Kur bëhet fjalë për udhëtime, disa turistë nuk kursejnë asnjë shpenzim. Dhe ka disa qytete, që janë si magnet për të tërhequr turistët e luksit, dhe ofrojnë mundësi për blerje luksoze dhe qëndrime në hotele me 5 yje.
Nga Dubai, qyteti luksoz në shkretëtirë, në Paris, qytetin e dritës dhe dashurisë, shumë turistë ndërkombëtarë po kërkojnë të vizitojnë destinacionet më të mira.
Të dhënat më të fundit nga Këshilli Botëror i Udhëtimit dhe Turizmit (World Travel and Tourism Council, WTTC), renditën 10 qytetet kryesore, ku turistët ndërkombëtarë shpenzuan më shumë në vitin 2022.
Qytetet e pasura
Vitin e kaluar, Dubai zuri vendin e parë, i ndjekur nga Doha në Katar.
Singapori dhe Macau përfaqësonin Azinë Lindore dhe Nju Jorku ishte qyteti i vetëm nga Amerika në listë.
Vlen të përmendet se, kjo listë ndryshon disi nga shpenzimet e përgjithshme të turizmit, të cilat do të përfshinin edhe shpenzimet e udhëtimit brenda vendit, ku SHBA dhe Kina renditen më mirë.
Destinacionet e preferuara
Kur flitet për udhëtime luksoze, ju mendoni për hotele me pesë yje, restorante me yje Michelin, dyqane luksoze të firmave më të njohura dhe shumë përvoja të tjera shtesë.
Qytetet më poshtë, u ofruan turistëve ndërkombëtarë pikërisht këtë.
Dubai
Nga Burj Khalifa, aktualisht ndërtesa më e lartë në botë, tek ekskursionet në shkretëtirë dhe lundrimet me jahte, Dubai ofron përvoja ekstravagante për vizitorët ndërkombëtarë.
Reputacioni i qytetit për blerjet pa taksa dhe përkushtimi i tij për të ofruar një përvojë luksoze, e ka bërë atë një destinacion kryesor udhëtimi për blerësit luksoz nga e gjithë bota.
Vendndodhja është një tjetër faktor në suksesin e qytetit. Dubai ndodhet në udhëkryqin natyror midis Europës, Azisë, Afrikës dhe Lindjes së Mesme, dhe është shtëpia e një prej aeroporteve më të ngarkuara në botë.
Udhëtarët ndërkombëtarë shpenzuan afërsisht 30 miliardë dollarë në qytet në vitin 2022.
Londra
Londra ka qenë prej kohësh vend i preferuar për miliarderët, dhe si rezultat, qyteti ka shumë lehtësi për turistët. Së pari, Londra ka numrin më të madh të hoteleve me pesë yje, krahasuar me qytetet e tjera.
Gjithashtu, Londra u ofron turistëve të pasur akses në një gamë të gjerë të stilistëve të nivelit të lartë, si dhe në muze, galeri dhe monumente me famë botërore.
Natyrisht, qyteti më i madh i Mbretërisë së Bashkuar gjithashtu ka vëllim të lartë të turistëve në përgjithësi.
Turistët ndërkombëtarë shpenzuan 16 miliardë dollarë në qytet në vitin 2022.
Makau
njohur si Las Vegasi i Azisë, qendra e lojërave të fatit në Macau ka qenë magnet për turistët ndërkombëtarë prej vitesh.
Megjithatë, ndërsa qyteti filloi të rimendonte strategjitë turistike pas pandemisë, ai është pozicionuar më fort si destinacion turistik ndërkombëtar.
Turistët sollën 15.6 miliardë dollarë në vitin 2022 dhe ky numër pritet vetëm të shumëfishohet më tej, gjatë dekadës së ardhshme.
Kjo rritje po nxitet nga Kina dhe Hong Kongu, të cilat përbëjnë pjesën më të madhe të vizitave. Megjithëse Macau është pjesë e Kinës, ai mbetet një rajon i posaçëm administrativ sipas parimit “Një vend, dy sisteme”.
Ndryshimi i tendencave të udhëtimit
Industria botërore e udhëtimeve vazhdon të rimëkëmbet pas pandemisë, një lajm i mirë për shumë kombe, që mbështeten ekonomikisht në turizëm.
Ndërsa kufizimet e udhëtimit u hoqën, shumë turistë u dyndën drejt destinacioneve të largëta, më pak të vizituara.
Sidoqoftë, studimi i WTTC është provë se, qytetet e famshme po shndërrohen sërish në itineraret kryesore turistike. / Visual Capitalist
