Kreu i opozitës,Sali Berisha, ka folur për mediat jashtë Kuvendit, ku ka hedhur akuza për lidhjen e Kryeministrit Edi Rama me çështjen e McGonigal.
Berisha tha se kjo çështje nuk mund të kalojë kështu dhe se në vend nuk do të ketë “paqe” deri sa kjo çështje të hetohet.
Ai u shpreh se Rama “ka paguar një vrasës me pagesë për të vrarë opozitën”.
“Për të zhvilluar debat për një çështje që ka tronditur gjer në palcë Edi Ramën. Imagjinoni ju se në ç’aferë është implikuar Shqipëria. Ky kryeministër me veprimtarinë e tij ka vënë në kërcënim sigurinë e SHBA, NATO-s dhe botës së lirë.
Imagjinoni një vrasës me pagesë që merr para nga kryeministri për të vrarë opozitën.
Ne këtë se kalojmë. Edi Rama është sot njeriu më i inkriminuar në Europë dhe më gjere. Kam bindje se drejtësia amerikane do të thotë fjalën e saj ndaj këtij krimineli. Por para saj do të flasin shqiptarët, qytetarët, parlamenti. Edi Rama me dy bashkëpunëtore ka trajtuar si aset privat shefin e kundërinteligjencës së FBI njeriun përgjegjës për të ndjekur të gjitha rrjetet e spiunazhit në SHBA dhe në sigurinë e vendeve të tjera.
E patë në parlament si u sollën? Sikur ska ndodh gjë. Pra jemi në një situatë të jashtëzakonshme. Vetëm një betejë e gjithanshme është shpëtimtare.
Nga ana tjetër theksoj se Edi Rama e ka përdorur atë si vrasës me pagesë për të manipuluar dhe falsifikuar kundër opozitës dhe kjo përbën një megakrim për të cilin do të kërkojmë nga autoritetet amerikane që tu japë dënimin më të rëndë.
Ju duhet ta dini se Delipaska është një ndër kompanitë sot më të fuqishme e më prezente në shqipëri. Një kompani e cila ka fituar statusin e investitorit strategjik, tendera nga FSHZH, koncensione, kanalizime, rrugë, ujëra. Delipaska është miku numër 1 i Vladimir Putinit. A u takuan Rama me Delipaskën do ta sqarojë drejtësia. Por një gjë eshtë e sigurt, Edi Rama me gjithë përcaktimet është agjent influent rus.
Edi Rama nuk ishte pa eksperiencë. Ai i ka bërë veprimet për llogari të një fuqie tjetër armike e NATO e SHBA. Edi Rama nuk i ka fshehur qëndrimet e tij proruse duke sulmuar evropën se bllokoi mallin e tij e kishte fjalën për gazin rus.
Pra siç e patë nuk pranuan, nuk lejuan, hodhën poshtë kërkesën të cilën e kërkon sot cdo qytetar shqiptar. Ky parlament nuk zhvillon dot punime pa u ndarë spektri i kësaj afere të tmerrshme që ka goditur Shqipërinë dhe ka goditur rëndë në opinionin publik amerikan dhe vende perëndimore.
Qëndrimi ynë është se nuk ka paqe në këtë vend pa u zgjidhur këto probleme. Revolucion, protesta…do të mbahen, urdhëro mos u ngut. Ja erdhi koha. Revolucion nënkuptoj largimin e kësaj kalbësire nga skena politike dhe rikthimin e votës së qytetarëve.
Dje kam thënë se kam njohur dy të tjerët jo këtë. Agron Nezën se ka një foto me mua po të garantoj se janë 100 mijë shqiptarë që kanë foto me Sali Berishën. Kam njohur shumë prej familjes së tij por këtë nuk e kam njohur. Neza do të bëjë cdo deklaratë për të shfajësuar veten” tha Berisha
