Kështu shkruan Profesor Tritan Shehu, ish ministër i jashtëm dhe deputet demokrat i Qarkut Gjirokastër.
Shehu shkruan në “Facebook”, se kjo është një nismë serbe dhe në funksion të krijimit të “Jugosllavisë së re”.
Ja postimi i plotë:
Thjesht për shkëmbim mendimesh:
1- “Ballkani i hapur” nuk është pa “pronar”!
Ai e ka atë, me “hipotekë ” në fakt sipas atij vetë.
Ai është Vucic, dishepull i reminishencave serbe të “ Jugosllavisë së re”.
E ka theksuar dhe e thotë përditë ai këtë: “Ballkani i hapur” është një nismë serbe e iniciuar nga unë ”. E ka “noterizuar” dhe Lavrovi.
Vucic, që akoma nuk ka kërkuar ndjesë për genocidin serb në Rajon, kërkon të jetë në krye të asaj “tavoline”, që do të përmbledhëse “viktimat” e tij.
2-Kjo nismë vuciciane për vetë mënyrën e konceptimit, inicimit, dimensioneve e përbërësve, nuk është e nuk mund të jetë një nismë ekonomike e mirëfilltë.
Në radhë të parë ajo është një nismë politike, thellësisht politike.
Elementët ekonomike të saj janë në funksion të vizionit politik të saj:
—Hegjemonisë politike serbe në Rajon me hegjemoninë ekonomike të saj.
Është një “non sens” i madh të mendosh se ky “Ballkan i hapur” mund të jetë një nismë strik brenda kornizave vetëm ekonomike.
3- Kundërvënia logjike e Kosovës ndaj saj nuk është e as mund të jetë një “diversitet” demokratik produktiv.
Kosova me të drejtë i kundërvihet sepse ajo kërkon të “sfumojë” pikërisht pavarësinë e sovranitetin e saj.
Dhe ky është një element thellësisht politik e aspak ekonomik.
Serbia jo vetëm nuk pranon pavarësinë e Kosovës, por as “targat” e saj.
Vucic, që veçse kërcënon me armë edhe para dy ditësh, nuk mund të jetë strumbullari gjithë përfshirës, garantuesi i paqes e bashkëjetesës në Rajon.
Serbia, pjesë e Traktatit EuroAsian të Rusisë, e vetmja mohuese në Europë e sanksioneve ndaj Moskës, e armatosur fort nga Rusia e Kina, nuk mund të jetë shtysa rajonale drejt Europës e Perëndimit me këtë nismë të saj, përkundrazi.
Këtë pozicion të vështirë e kompleks, këto objektiva jetike për ne, mund t’i luajë vetëm Brukseli me nismat e tij.
Dhe ky është një pozicion e detyrim thellësisht politik.
