Ditën e premte, grupi ekspertëve të PD-së për reformën territoriale, thirri në Durrës një takim konsultues për bashkitë e këtij qarku.
Së bashku me deputeten e Krujës znj Merita Bakiu, ne këmbëngulëm në idenë se Rrethi i Krujës duhet të ketë detyrimisht dy bashki, atë të Krujës dhe bashkinë e Fushë Krujës.
Kjo ndarje administrative është e domosdoshme për qytetarët e gjithë rrethit.
Për të patur një pushtet lokal në shërbim të qytetarit, Bashkia Krujë duhet të përbëhet nga tre njësi administrative, Krujë, Thumanë dhe Malësia.
Pjesa tjetër vihet nën juridiksionin e bashkisë Fushë Krujë.
Për të arritur këtë, kërkova që ligjvënësit e PD-së në parlament, duhet të kërkojnë ngritjen e një grupi pune të gjerë, ku të përfshihen përfaqësues politikë nga gjithë subjektet e zonës tonë, ekspertë të territorit, biznesit, arsimit, sigurisë etj.
Deputetja Bakiu dhe unë, në fjalën tonë u përqendruam në idenë se “Reforma Territoriale Administrative është reforma më e rëndësishme në këto 32 vite tranzicion përsa i përket zhvillimit të të gjithë Shqipërisë, por objekti i diskutimit në këtë rast mbetet Kruja dhe njësitë administrative të zonës tonë.
Nëse kjo reformë finalizohet me sukses, jo vetëm që do të ndikojë drejt për drejt në zhvillimin e të gjithë vendit, por po ashtu do të jetë një faktor serioz për ndalimin e shpopullimit të Shqipërisë tonë
Në këtë ndarje territoriale duhet fokusuar në disa faktorë apo elementë kryesor.
1-Elementi historik është i pari, pasi është e lehtë, që me një vendimmarrje të pa konsultuar dhe të pa studjuar të shuash një qytet me histori, por në mënyrë direkte ke shuajtur edhe një pjesë të historisë së kombit, kur vjen fjala te Kruja si simbol i qëndresës kombëtare.
Kujtoj se kur në pushtet ishte Partia Demokratike, Kruja kishte gjithë institucionet si Gjykata, Prokuroria, Përmbarimi, Drejtoria e Tatim Taksave, Hipoteka, Drejtoria e Sigurimeve Shoqërore dhe institucione të tjera të cilat nuk ishin vetëm shërbime në portën e qytetarëve por edhe vende pune, një standard që e bënë një qytet të jetueshëm dhe ku shumë pak e mendonin ta braktisnin, ndryshe nga sot.
Asnjë institucion i rëndësishëm nuk ka mbetur në Krujë veç bashkisë, arsimit, polici dhe shëndetësi.
2- Elementi Gjeografik, është shumë i rëndësishëm. Sa larg janë shërbimet, sa km larg banojnë qytetarët.
3-Elementi demografik, sa është dendësia e banorëve për njësi territori, sa shkolla duhen, ambulanca, mjete transporti, dyqane e shërbime të tjera.
3- Elementi i Funksionalitetit është shumë i rëndësishëm për banorët pasi në çdo vend shërbimi shkon tek ata dhe jo banorët te shërbimi.
4‐ Elementi i zhvillimit ekonomik është pika më e rëndësishme për çdo qytetar.
Çfarë mundësi zhvillimi në perspektivë krijohet, sa të qëndrueshme mbeten, sa vetë punësohen, sa konsum, sa lëvizje mallrash.
Bujqësia dhe agrobiznesi, çfarë sipërfaqe të punueshme në dispozicion, sa njësi frigoriferike.
Pemëtaria, blegtoria, shpendët, bletët, burimet ujore, agropërpunimi, bimët medicinale etj.
5- Turizmi si pikë kyçe për qytetin tonë. Mundësitë, pritshmëritë, bujtinat, hoteleri, restorante, prodhimi artizan etj.
Këtu u fokusuan diskutimet tona për ndarjen e re territoriale… Nëse ndodh, sigurisht.
